Hari Sanayan (12/12/2016) batapatan
lawan tanggal 12 Rabiul Awal 1438 H, aku saruan maulid anu kawan, Pa Haji Didi
di Taniran Kubah.
Tulak matan rumah di Angkinang, sakitar
pukul dalapan baisukan. Jarak rumahku ka rumah Pa Haji Didi sakitar dua pal.
Tulak ka sana basapida mutur.
Singgah satumat di sakulahan, ada nang
diambil. Imbahitu langsung ka Taniran. Pas datang di rumah Pa Haji Didi, masih
balum banyak. Aku duduk di palatar rumah Pa Haji Didi.
Acara maulidnya di rumah abahnya di
subarang. Imbah takumpulan urangnya, maulid dimulai. Diawali pambacaan surah
Yasin. Imbah tuntung undangan disuguhi lontong hintalu masak habang.
Imbahitu dilanjutakan pambacaan syair maulid
habsyi ulih kakanakan Madrasah Tsanawiyah Negeri (MTsN) Angkinang, Kabupaten
Hulu Sungai Selatan (HSS). Tuntung bahabsyi tamu disurungi puracit.
Undangan nang hadir saruan maulid anu Pa
Haji Didi nang aku kanal antara lain Bapa Sayuti, Tami, Bapak Syamsudin,
Abahnya Mamun, wan Rudin.
Buhan tamu undangan manuju Masjid As Saadah Taniran Kubah, maumpati maulid disana.
Ada caramah agama ulih Tuan Guru H Gafar matan Barabai. Lalu pambacaan rawi-rawi.
Imbah Juhur hanyar acara tuntung.
Buhan undangan bulikan ka rumah tuan
rumah nang maundang masing-masing. Kami makanan pulang. Kali ini ada iwak
haruan basanga wan sapat karing. Gangan waluh wan humbut. Ada jua agar-agar. Bulikan
undangan dibarii barakat iwak wan nasi. Aku bulik ka rumah sampai satangah satu.
(akhmad
husaini)
Tidak ada komentar:
Posting Komentar