Di kantur wadah Dugal bagawi kaciuman
bau durian. Mulai guru sampai kakanakan palajar tumbur. Padahal kadada rapun
buah durian parak sakulahan, jua jauh wan urang bajual durian.
Tiap nang masuk ka kantur takun-takunan.
Dimana asal bau durian nintu. Sakalinya ada sabigi durian di ruang Dugal bagawi.
Durian nintu babungkus palastik hirang.
Durian nintu barian anak murid baisukan, gasan Dugal. Ujar anak muridnya nintu
durian kiriman umanya.
“Gasan pian, mama tadi bakirim,” ujar
anak muridnya manjurung bungkusan palastik hirang anu Dugal.
Dugal singhaja maandak di dalam ruang inya
bagawi, supaya kada katahuan. Tapi nyatanya urang tumbur mancium bau durian
nintu.
Rancananya durian nintu gasan dibawanya
bulik ka rumah, dimakan di rumah haja. Durian itu sabigiannya, jadi alang-alang
amun dibagi. Kakawanannya di kantur bahujung tarasai baunya haja. (akhmad husaini)
Tidak ada komentar:
Posting Komentar