Rami buhan kakawanan Dugal nang bibinian
maulah guguduh di ruang guru. Saikung guru dapat sabuting guguduh. Karna nang
maulah Acil Imus, nyaman banar guguduhnya.
Kada lawas datang Papah Idun. Balalu maambil
tiga buting guguduh nang ada di piring di atas mija ruang guru.
Guru nang lain managur. Kanapa mambawa
tiga buting, saikung urang sabuting haja jatahnya. Balalu Papah Idun manjawab,
inya handak maambilakan gasan Ading Sasa wan Ading Irum. Imbahitu Papah Idun mangiap
mamakan sabuting gasan jatahnya.
Nang dua buting tadi dibuatnya ka dalam
kantungan palastik. Mancari Acil Sasa wan Acil Irum. Karna nang badua tadi kadada
di ruang guru. Imbah dicarii tanyata ada di kantin sakulahan.
Malihat Papah Idun datang, Acil Sasa wan
Acil Irum pina manggatar awak. Takutan napa-napa. Pas jua ai, Papah Idun
mamaraki kaduanya. Ini nah gasan buhan pian badua makanha. Guguduh itu diandak
Papah Idun di mija kantin.
Imbah itu Papah Idun, kaluar kantin
handak maajar di kalas. Acil Sasa wan Acil Irum, takutan kalu napa-napa,
balaluai guguduh tadi dilainakan, diandak parak lamari is. Buhannya takutan
guguduh tadi sudah di jampi-jampi ulih Papah Idun.
Singkat kisah, guguduh nang diandak di
kantin sakulahan kadada lagi. Sakalinya di makan ulih Paman Ijak, waktu minum
di kantin, karna kadada wadai lagi, kada tahu pada guguduh itu ti gasan Acil
Sasa wan Acil Irum, jurungan Papah Idun.
Maksud hati Papah Idun gasan
mangarindangi Acil Sasa wan Acil Irum, tanyata ta ka anu Paman Ijak bukahnya. Jadi
am wayahini Paman Ijak pina masra banar lawan Papah Idun. Tamakan guguduh
karindangan nintu saku? (ahu)
Tidak ada komentar:
Posting Komentar