Puisi Banjar Rasuna : Baungut Diri

Kamis, 13 Desember 2018

Rasuna

BAUNGUT DIRI

Baungut diri
Duduk manyaurangan
Ading sayang
Rambut maikal Mayang
Baharap lakas datang
Kaka Nang tulak madam
Asa lawas tasiksa badan

Taikat janji kada bapapagatan
Limbah jauh pangrasa dihadapan
Ilan guring ta ganang
Igau saling nyaringan
Uuuyy Kaka...lakas pang datang

Siang malam tabayang
Tabayang Kaka Nang datang
Kada panas kada hujan
Kaka Nang dihadang hadang

Kada pang susut
Amas dipakai
Kilau Kilauan
Dijari tangan
Kada mamutus
Kasih dibadan
Sabalum mata dipajamakan

Lamunlah janji
Jangan dirista akan
Mun juduh
Tatap jua ditamuakan

Biar tahalat gunung
Dalas tapisah kampung
Juduh Allah
Sudah ditantuakan