KUMPULAN PANTUN AKHMAD HUSAINI

SABTU, 27 FEBRUARI 2010


Tulak kahutan mancari bilaran
Gasan dikumpulakan diulah tali
Zarah ka Makam Karamat Datu Taniran
Nang katurunan Syekh Muhammad Arsyad Al Banjari

Mamajahi api tatinggal bara
Jauhakan lawan bibilah
Handak dapur datang ka Nagara
Karna disana banyak urang maulah

Bajual jaring baisukan tadi
Banyak urang nang manukarnya
Aku saurangan malam ini
Handak ka Kandangan kadada nang mambawa

Kuburan hanyar batajak batur
Supaya urang tahu tandanya
Nyaman jua baisi sapida mutur
Handak kamana haja lakas sampainya

Amun bajalan jangan talalu alun
Biar capat lakas sampainya
Jangan talalu banyak malamun
Kalu kalawasannya kaina jadi urang gila

Handak ka subarang liwat jumbatan
Singgah satumat manaik nangka
Jangan wani mahulunakan kuitan
Kaina durhaka bisa masuk naraka

Baulah kalayangan nang paling halus
Andak kahiga maambil banang
Amun kakak-kakak kalas IX sudah lulus
Jangan kada ingat lawan kami di MTsN Angkinang

Manulis cerpen sasuai tema
Tuntung dikatik kirim ka koran
Amun buhan pian sudah masuk SMA
Rajin-rajin balajar jangan banyak pacaran

Piring bahari piring malawin
Gugur ka lantai kada singhaja
Amun buhan pian kaina sudah kawin
Pasan ulun cukup dua ikung anak haja