Malam Imbah Isya Dugal ka gardu pus
runda, bahuhurun. Kakawanannya batakun anu Dugal napa kada talihat dalam
babarapa hari ini. Laluai Dugal mamadahakan bahwa inya umpat Aruh Sastra di
Pagatan, Tanah Bumbu.
Anu kawannya Dugal manyambat, tulak ka
Aruh Sastra liwat bandara. Padahal sabujurnya tulakan ka sana ba bis. Kawannya
kada parcaya, mana ada lapangan tarabang di gunung. Paling ada jua andaknya di Batulicin.
Tapi kanapa Dugal sampai mamadahakan inya dua kali singgah di bandara yakni
paraan wan bulikan.
Rumbungan buhan Dugal tulak ka Aruh Sastra
di Tanah Bumbu liwat jalan gunung. Taparak sadikit daripada jalan Banjar. Naik
bis matan Kandangan, lalu maliwati babarapa dairah di kawasan Pagunungan Maratus,
nang ada di babarapa kabupatin di Banua. Ada Hulu Sungai Salatan, Tapin, Banjar,
wan Tanah Bumbu.
Sakalinya bandara nintu tadi ngaran
dusun atawa kampung nang ada di kawasan Pagunungan Maratus. Dugal kada tahu
apakah Bandara nintu masuk wilayah Kabupatin Banjar atawa Kabupatin Tanah Bumbu.
Amun kada salah kampung Bandara itu kada
jauh pada Paramasan Bawah, subalah kanan amun mulai arah Kandangan. Di Bandara
buhan Dugal singgah baistirahat, sambil minuman wan makan di sabuah warung,
baik waktu paraan atawa bulikan maumpati Aruh Sastra di Pagatan. (ahu)
Tidak ada komentar:
Posting Komentar