Pangalaman di Hutil

Kamis, 13 April 2017

Dugal tamasuk urang nang bauntung. Walau hanya pagawai randah di kanturnya, tapi sual tugas kaluar dairah inya salalu diumpatakan. Bahkan sabulan sakali inya umpat palatihan. Bulan dahulu inya umpat palatihan kahumasan di sabuah hutil di Banjar.

Bulan ini inya ditunjuk pulang umpat palatihan di hutil di Banjar, masalah kaparatukulan wan pambawa acara. Himung banar Dugal umpat kagiatan kaya itu. Tarasai jua ujar Dugal bamalam di hutil, garatis dibayariakan buhan panitia palaksana acara palatihan.

Karna urang kampung tantu banyak hal nang mambuat Dugal marasa kurang tiap kali bahubungan lawan alat mudirin nang ada di hutil. Kaya naik lip. Dugal labih mamilih naik tangga biasa dari pada naik lip. Takutan napa-napa lawan lip, kalu salah picik.

Jua saat di dalam kamar mandi. Dugal sampat kababang waktu mandi. Karna mandi disana kada kaya wadah banyu di Banua. Disini nang ada hanya shower nang tinggal dipicik tumbulnya. Pas waktu itu Dugal tapicik warna habang, napa tia Dugal kababang  kapanasan. Karna banyunya panas untung sawat dimatii, amun kada bakal bahangitan atau luyuh nang di bawah.

Dugal dipadahi kawannya amun nang dingin tumbul warna biru nang dipicik. Lihum saurang Dugal malihat kalakuannya nang jadi urang udik masuk ka hutil. Tapi itu jadi pangalaman baharga. Nang paling dikatujui Dugal waktu makan, baik baisuakan, siang wan malam.

Waktu di kampung paling iwak hayam nang parnah dirasai. Waktu di hutil inya tinggal pilih napa nang disukainya. Jubung piring Dugal, cangangan kakawanannya. Saatnya ujar Dugal balas dandam. Pabila lagi amun kada wayahini. Kaina bulik palatihan Dugal katahuan sasain balamak, marga nyaman pamakan.

Tapi Dugal tamasuk urang nang patuh aturan. Jangan mambawa bulik napa nang ada di hutil. Inya biasa mandangar kisah kawannya di kantur, waktu itu ada palatihan bandahara madrasah, mambawa bulik handuk. Kaiyaannya kawannya itu tadi baurusan wan pihak panitia sarta manajamin hutil.

Sampai ditalipun ulih panitia supaya handuk hutil dibulikakan ka hutil wadah umpat palatihan. Jadi Dugal paham inya kada bakalan mambawa apa-apa nang ada di dalam kamar hutil. Kacuali tas saurang basarta isinya. (ahu)