Umpat Bagarit Kuyang

Sabtu, 14 Januari 2017

Gigir kuyang di Awayan, Kabupaten Balangan, maulah Dugal panasaran. Inya umpat datang kasana handak tahu langsung kisah sabujurnya.

Kamarian imbah Ashar lawan kawannya Undat, Dugal tulak basapida mutur, nang jaraknya sakitar 80 pal pada rumah Dugal.

Sampai di Balangan buhan Dugal manuju ka Pulsik satampat, bapadah minta ijin handak maumpati runda malam di kampung nang tumbur urang malihat kuyang. Karna ujar habar rami warga disana barunda malam gasan mancari kuyang.

Imbah Isa Dugal bagabung lawan warga kampung nang handak bagarit kuyang. Buhan warga macam-macam nang dibawa. Ada nang mambawa parang, tali haduk, katikan, rapun bamban, jariangau, papangkung, wan lain-lain.

Malam sabalumnya, Acil Inur, warga satampat, ujar habar batamu kuyang. Waktu itu Acil Inur handak ka bakamih di pabanyuan.

Tiba-tiba sidin mandangar suara gagarincing di balakang pabanyuan. Panasaran Acil Inur mahindau lawan sintar, takajut banar sidin kalinya ada mahluk nang diparkiraakan sidin itu adalah kuyang, karna hanya talihat kapala nang gulunya pagat badarahan.

Acili Inur mawaniakan diri mandatangi kuyang nintu. Acil Inur baduhara kaluar rumah, tapi imbah itu dicari sidin kuyang itu sudah hilang.

Imbah kajadian itu balalui warga bajaga pulang di parak rumah Acil Inur, kaluai kuyang itu datang pulang. Rumah Acil Inur andaknya pas banar basubarangan lawan gardu pus runda.

Jadi warga labih laluasa bakumpulan, nyaman sambil bamasakan, minum kupi atawa tih, nang diulah wan dinikmati sacara basama-sama.

Sampai jam ampat Dugal wan Undat umpat bajaga malam di kampung nintu, bagabung wan buhan warga, tapi kuyang nang handak ditamui kada cangul-cangul.

Imbah sambahiyang Subuh Dugal wan Undat bulik ka rumah nang bajarak 80 pal lagi pada kampung wadah umpat bagarit kuyang nintu. (akhmad husaini)