Di sakulahan Dugal imbah upacara bandira
ada acara panyarahan hadiah wan piala gasan
pamanang lumba. Nang manyarahakan buhan jajaran di sakulah nintu jua.
Yaitu Kapala Tata Usaha wan Wakil Kapala.
Hari itu Kapala Sakulah kadada di
tampat, karna ada kagiatan dinas di luar dairah. Jadi buhan sidin haja mawakili
manyarahakan piala.
Kabalujuran hari itu datang Ibu Pangawas
Sakulah di sakulahan wadah Dugal bagawi. Jadi sidin umpat didaulat jua gasan
manyarahakan hadiah.
Ada saku puluhan hadiah nang
disarahakan. Salah saurang guru, Ibu Anil umpat jua maju ka muka, gasan
manarima hadiah.
Sidin ti mawakili kawannya sabagai Juara
I Marangkai Buah. Ibu Anil himung banar karna nang manyarahakan hadiah adalah
Ibu Pangawas.
Ibu Anil takajut, inya diragap wan
dicium ulih Ibu Pangawas imbah hadiah dijurung. “Tahun kaina mudahan juara
pulang,” ujar Ibu Pangawas anu Ibu Anil babisik.
Imbah itu Ibu Anil masuk ka ruang guru.
Lalu digayai kakawanan nang lain. “Umailah situ pina masra banar lawan Ibu
Pangawas, sampai baragap wan bacium sagala,” ujar kawannya.
Ibu Anil, kada manjawab, cuma lihum
haja. Imbahitu Ibu Anil masuk ka kalas maajar kakanakan sasuai pak inya. (ahu)
Tidak ada komentar:
Posting Komentar