Dugal wan bininya Aluh Lantih wan dua
anak bibiniannya, Imai wan Idah tulak ka Sampit, Kalimantan Tengah, jarah ka makam
katurunan Datu Kalampayan, nang bangaran Syekh Haji Abu Hamid.
Dugal nang bagawi di tsanawiyah, sabalum
ka Sampit inya minta ijin lawan busnya. Jua bininya nang maajar di tsanawiyah,
tapi lain madrasahnya, jua minta ijin anu busnya.
Samantara anaknya sudah minta ijin jua
anu wali kalas di madrasah buhannya sakulah. Imai sudah kalas dua Aliyah, samantara
Idah kalas dua tsanawiyah.
Dugal sakaluargaan tulak kasana naik
mutur ampun saurang, Irtiga. Tulak jam sablasan, sampai di Sampit tangah malam.
Buhannya manginap di rumah kawannya di Bagendang Hulu.
Hanyar baisukan pukul dalapan Dugal
manuju lukasi makam nang bajarak sakitar 90 pal matan rumah kawannya tadi.
Waktu Dugal datang di kawasan Pantai
Ujung Pandaran, sudah banyak urang. Lalu Dugal mamarkir mutur Irtiga ampunnya.
Dugal lawan bini wan anaknya, manyiwa
mutur bak tarbuka gasan manuju lukasi
makam, nang bajarak sakitar dua pal pada buhannya tadi mamarkir mutur.
Manyiwa mutur dua ratus ribu rupiah.
Sampai di makam Dugal wan kaluarganya langsung masuk ka kubah makam.
Mambaca Surah Yasin, zikir dan do’a.
Dugal batamu lawan dua panjaga makam, salah saurangnya bangaran Aspar. Dugal
sampat mawawancarai sidin, gasan kaina di tulis di blog.
Dugal manjurungi ampluk nang sudah
disiapakan, ka anu kaduanya. Imbahitu Dugal sakaluarga babulik ka wadah
mamarkir mutur. Lalu istirahat satumat, imbahitu manikmati panurama alam Pantai
Ujung Pandaran.
Buhan Dugal sawat jua basilpi balatar
pamandangan babarapa tampat di Pantai Ujung Pandaran. Kaya di rumah Betang.
Jua buhannya naik banana boat wan jet
ski. Imbah puas buhannya bulikan, kada lupa singgah satumat di rumah kawannya
wadah bamalam, bapadah handak bulikan, kada ingat pula maninggali uih-ulih has
Banua. (akhmad husaini)
Tidak ada komentar:
Posting Komentar