Palatar rubuh
pina tajunggat
Handak dibaiki
jangan mahadang kaina
Sungai Angkinang
pina marigat
Banyak ratik
tatuyuk dimana-mana
Rapun kasturi
sasain rawak
Marga ditabang
diulah bahan bangunan
Saban hari ada
urang bajual iwak
Nang sudah
langganan di sakulahan
Ka Kandangan
manukar kuini
Tulak ka pabrik
maatar banih
Kasihan warga
Angkinang wayahini
Musim kumarau
ngalih banyu barasih
Tangah malam
suasananya pina ranai
Handak bulik
mambari salam
Rami banar mandi
di Riam Hanai
Sambil manikmati
pamandangan alam
Tangahari
mamancuk katapi
Kakanakan rami
bamainan
Asa galianan
malihat artis di tipi
Mambuka aurat
kada sing supanan
Imbah mandi
kakanakan lalu dibajui
Dibawa ka warung
minum tih
Di Trans 7 ada
acara nang kukatujui
Lenong Rempong
wan Hitam Putih
Rumah urang
sugih mamakai batun
Kira-kira banyak
biaya maulahnya
Sudah lawas aku
kada bapantun
Mudahan kaina
rajin pulang maulahnya
Masih ragu
apakah balum atawa sudah
Manukar barang
sasuai haraga
Rajin-rajin
baamal ibadah
Supaya tambah
pahala wan masuk surga
Bajalan di
pahumaan malihat ular
Lakas-lakas
dipukul supaya bapindah
Ada haja pang
asa muar
Malihat urang
saban hari mandi mamakai banyu kran kada bapadah
Urang asing
babahasa nang pasih
Buliknya bagana
di rumah RSS
Mudahan MTsN
Angkinang tatap barasih
Jadi sakulah
nang tabaik di HSS
Parak tangahari
manabang pinang
Gasan pantul
urang pangantin
Saban baisukan
Sabtu di MTsN Angkinang
Ada upacara
pramuka nang sudah rutin
Tulak ka hutan mancari
paikat
Banyak-banyak
basangu makanan
Kabut asap
sasain pakat
Marga urang
mambanam lahan
Tidak ada komentar:
Posting Komentar